迪亞路上位　曼聯願賤賣安東尼

曼聯上場英超以3比2擊敗紐卡素，21歲翼鋒阿密特迪亞路射入1球及1次助攻，僅用1場波，就追平隊內另一位翼鋒安東尼馬菲奧斯今季聯賽入波及助攻數據，兩人表現形成強烈對比。據悉曼聯新股東拉特克利夫已經對安東尼忍無可忍，只要有球會出到3,000萬鎊(約2.96億港元)轉會費，就會出售安東尼。

阿密特迪亞路今季英超僅上陣8次，包括2次踢正選，合共321分鐘，射入1球及1次助攻，至於安東尼踢29場英超，包括15場正選，總共上陣1,323分鐘，但同樣只有1入波及1次助攻，實在講唔過去。

再睇埋阿密特迪亞路近2場對阿仙奴及紐卡素，合共送出4次關鍵傳球及6次成功扭過對手，表現光芒四射，點睇都比安東尼更值得踢正選，預料阿密特迪亞路將會擔正出戰英足盃決賽對曼城。

反觀安東尼馬菲奧斯成為高薪冗員，會方計劃出售佢，問題係呢位巴西國腳周薪達20萬鎊(約197萬港元)，就算曼聯願意減價出售佢，佢都未必肯減人工離隊。