阿特蘭大獲歐聯入場券　強勢爭奪歐霸盃

周日(19日)凌晨意甲，阿特蘭大作客以2比0擊敗萊切，取得聯賽5連勝，領先第6位羅馬6分，加上對賽成績較佳，提早2輪聯賽，獲得下屆歐聯參賽資格，並為嚟緊周四(23日)凌晨歐霸盃決賽對利華古遜，壯大聲勢。

下屆歐聯擴軍，今季意甲前5位球隊都可以參賽，阿特蘭大成為最大得益者，呢支「神奇球隊」今仗上半場佔唔到優勢，但換邊後迅速打開紀錄，施卡馬卡長傳，基迪拿尼半單刀射入，呢位23歲比利時國腳近2場聯賽入3球，狀態非常出色。

僅過5分鐘，施卡馬卡頂入角球，為阿特蘭大領先至2球，呢位意大利國腳今場1入波及1次助攻，演出同樣搶鏡。意甲排名同分先計對賽成績，阿特蘭大兩循環對羅馬，取得1勝1和，肯定可以排前5位。

意甲下屆歐聯5個席位全部誕生，包括國際米蘭、AC米蘭、博洛尼亞、祖雲達斯、阿特蘭大。值得一提，如果阿特蘭大奪得歐霸盃冠軍，同時以聯賽第5位過終點(不可入前4位)，意甲第6位球隊都可以參加下屆歐聯。