車路士6,500萬歐元簽「新韋利安」

英超勁旅車路士繼續豪氣！雖然一直有傳佢哋受財務違規問題困擾，不過買人繼續唔手軟，據報車路士已同巴甲球隊彭美拉斯達成協議，以總值6,500萬歐元嘅轉會費收購翼鋒艾斯迪禾韋利安，呢位17歲新星將會喺明年4月「成年」後正式加盟。

艾斯迪禾韋利安被譽為巴西明日之星，車路士對佢志在必得，經過超過1個月談判後，周六(18日)終於達成協議，轉會權威Fabrizio Romano透露，車路士將會先向彭美拉斯支付4,000萬歐元，另加2,500萬歐浮動獎金條款，轉會費總值6,500萬歐元，打破南美洲U18球員轉會費紀錄。

由於英超禁止同未成年球員簽約，所以艾斯迪禾韋利安要等到明年4月18歲生日，先至正式簽約加盟，合約年期為7年。車路士近2年不斷發掘美洲新星，之前已簽入巴西中場安迪利山度士、前鋒戴維德華盛頓同厄瓜多爾天才中場柏斯。