曼聯創最低排名紀錄　34年首次得失球負數

曼聯喺英超煞科戰，憑達洛治同海倫各入1球，作客2比0擊敗白禮頓，不過由於紐卡素亦以4比2擊敗賓福特，曼聯最終只能以第8名完季，創下球會英超史上最低排名紀錄。曼聯今季得失球差為-1(入57球、失58球)，亦係34年來首次出現負數情況，不過佢哋周六(25日)仲有場英足盃決賽，仍有機會Happy Ending。

曼聯贏波後有60分，但得失球唔及紐卡素排第8，意味佢哋錯失歐協聯參賽資格，如果唔想緣盡歐洲賽，唯一途徑就係擊敗曼城拎英足盃冠軍，從而獲取歐霸盃入場券。曼聯領隊坦哈格賽後表示：「第8名係最差排名，呢個係事實，我哋可以做得更好，所有人都知道背後嘅原因，但依家唔係討論嘅時候。」

曼聯今場有好消息，利辛度馬天尼斯正選上陣，華拉尼同莊尼伊雲斯亦後備登場，坦哈格表示：「今季我哋中堅位置傷患問題係災難，好慶幸依家有球員畀我揀。我哋會盡力踢好場決賽，入得決賽就一定以冠軍為目標。」