艾達臣被羅美路K.0　巴西再選4將踢美洲盃

巴西早前公布美洲國家盃23人名單，主帥杜利華祖利亞周一(20日)宣布再召入4人，除咗補選3將湊夠26人之外，門將艾達臣摩拉斯亦告因傷退隊，佢之前喺英超對熱刺被撞到重傷，「兇手」正正係巴西大敵阿根廷嘅中堅基斯甸羅美路。

艾達臣摩拉斯因眼眶骨折，已宣布無緣踢英足盃決賽，估唔到連美洲國家盃亦都參加唔到，巴西已補選聖保羅老將拉菲爾皮利斯頂替，但預計利物浦門將艾利臣比加將會出任正選。另外，領隊杜利華祖利亞亦用埋最後3個名額，祖雲達斯嘅基爾臣比爾馬、阿特蘭大中場艾達臣荷西同波圖翼鋒比比獲徵召。

杜利華祖利亞表示：「所有獲徵召嘅球員，無論係初選定係補選，我都會一視同仁，一齊用表現去競逐正選位置。」今屆美洲盃喺6月21日展開，巴西喺D組同巴拉圭、哥倫比亞以及哥斯達黎加同組。