利物浦官宣施洛下周上任　首签飞燕诺爱将

随住英超煞科同高普离开，利物浦正式进入新时代，球会周一(20日)官方宣布，荷兰主帅施洛将会喺6月1日成为新帅，双方签约3年。荷兰传媒爆料，重整防线系施洛首要任务，预计今夏至少签2个守将，而佢喺飞燕诺嘅爱将基尔图特亚，就有“大于50%”机会成为施洛首签。

45岁嘅施洛接班高普早已系公开秘密，利物浦周一就官方确认，申请工作证后会喺下周六(6月1日)正式开工，值得留意系佢嘅职位系“教练”，并唔系高普或历任领队所用嘅“领队”，意味佢嘅话事权将要同新任总监米高爱华士、获特等人瓜分，而佢嘅主要职务会系球场上嘅管理。

施洛下周上任后，将会即刻同球会制定转会计划，由于祖尔麦迪比确定离队，令原本已唔够人嘅防线更加薄弱，据报今夏至少会签2名守将，荷兰权威媒体《电讯报》报道，可以踢右闸同中坚嘅飞燕诺新星基尔图特亚，已成利物浦头号猎物，而且有“大于50%”机会跟施洛过档。

23岁嘅基尔图特亚系荷兰国脚，上月底爆出施洛将执教“红军”后，呢位守将即被影到入场睇利物浦比赛，而佢喺上场煞科战后亦强烈暗示离队：“我答唔到你今场系咪喺飞燕诺最后一战，但我从来唔系为钱踢波，呢个唔系我拒绝续约嘅原因。”基尔图特亚同飞燕诺只剩1年合约，消息指利物浦只要2,200万镑就可以签人。