震惊！拜仁正式斟介英超“降班领队”

德甲班霸拜仁慕尼黑今季“四大皆空”，物色新教练嘅计划亦狂食柠檬，估唔到近日出现惊人名字，据Fabrizio Romano同多间德国媒体爆料，拜仁睇中英超降班球队般尼嘅主帅高柏尼，并且已经展开接触，令球迷大感震惊。

拜仁斟介沙比阿朗素、拿高斯文、兰历克等失败后，早前盛传同杜曹倾续约，但权威记者Romano周二(21日)爆料：“拜仁有几个英超领队目标，高柏尼系其中之一。据悉拜仁高层已经亲自致电，高柏尼持开放态度，时间尚早但佢肯定系目标之一。”德国《天空体肯》记者Florian Plettenberg亦确认呢个消息。

38岁嘅高柏尼师承哥迪奥拿，球员生涯曾喺德甲效力汉堡2年，虽然今季执教般尼降班收场，但佢嘅进攻风格仍获肯定。对于斟介高柏尼嘅传闻，拜仁荣誉会长汉尼斯就回应：“高柏尼？你哋(记者)每日掟个新名出嚟，唔使啦，我哋中坚有马菲斯迪历特同艾历迪亚已经足够。”高柏尼球员时代踢中坚，汉尼斯“玩嘢”回答成功避开敏感问题。