沙拿留隊？發文來季力爭冠軍

一直有傳穆罕默德沙拿今夏將會離開利物浦，轉赴沙特落班賺取巨額收入，但似乎有轉機，呢位埃及射手在社交網發文表示，會在來季爭取捧盃，意味住會繼續留隊。

沙拿在社交網發文稱：「我哋知道獎盃好重要，我哋將盡一切可能在來季實現目標。球迷們值得我哋去搏命。」

利物浦今季在爭標關鍵時刻失分，退出聯賽競逐，其後又發生沙拿同高普拗撬事件，外界一般估計，高普離隊後沙拿亦會離隊，而沙拿同利物浦僅餘下最後1年合約，離隊機會頗高。

不過在早前公布嘅利物浦來季球衣預告片中，沙拿仍然有分亮相，加上呢則社交網發文表忠心，似乎呢位31歲前鋒將會留喺紅軍履行最後1年合約。

此外，埃及奧運隊主帥米卡萊表示，希望徵召沙拿參加今夏巴黎奧運。曾率領巴西奪得2016奧運男足金牌嘅米卡萊，現時執教埃及奧運隊，今屆賽事同組有西班牙、多明尼加及烏茲別克，米卡萊稱希望埃及足總與利物浦商討後有好結果。