利物浦領隊高普離隊之後，中場阿歷斯麥亞里士打亦可能步佢後塵，根據阿根廷媒體《DSports Radio 103.1 FM》爆料，皇馬計劃斥資6,000萬鎊(約5.9億港元)直接買斷呢位25歲阿根廷國腳。

據悉皇馬考慮到卻奧斯已決定今夏掛靴，至於莫迪歷年紀大，就算留隊，恐怕身體條件都難以應付下季頻密賽程，加上今季頻頻出現傷兵，會方吸取教訓之後，計劃今夏簽入中場，並睇中阿歷斯麥亞里士打。

阿歷斯麥亞里士打上年夏天以5,200萬鎊(約5.15億港元)轉會費由白禮頓加盟利物浦，為紅軍各項賽事上陣45場，射入6球及7次助攻，包括英超上陣32場入4球及5次助攻，平均每場有3次搶截，踢法攻守兼備。

雖然利物浦無意出售呢位猛將，但阿歷斯麥亞里士打嘅毀約金僅6,000萬鎊，皇馬有權以呢個價錢買斷佢，至於能否成事，就要睇阿歷斯麥亞里士打意願。