因為沙比　利華古遜有半個主場之利

今屆歐霸盃決賽將於中立場愛爾蘭都柏林舉行，阿特蘭大對利華古遜，根據2020年一項調查，原來有29%愛爾蘭球迷屬於利物浦支持者，利華古遜教練沙比阿朗素係紅軍名宿，並一度被視為高普接班人，佢今次領軍去愛爾蘭比賽，應該會獲得當地球迷打氣，變相令利華古遜佔有半個主場之利。

歐洲足協曾引述2020年一項調查，指29%愛爾蘭球迷屬於利物浦支持者，如果呢支英超勁旅打入決賽，等同有主場之利。不過，紅軍喺8強被阿特蘭大淘汰出局，無緣親臨「主場」爭標，阿特蘭大變成紅軍仇人，呢支意甲球隊今次造訪都柏林，恐怕會成為當地利記球迷嘅眼中釘。

反觀，利華古遜教練沙比阿朗素一向深受紅軍球迷愛戴，適逢都柏林有大量利物浦支持者，相信佢哋今場應該會力撐沙比，利華古遜未踢已先贏氣勢。