葡萄牙確定26人名單　C朗第6度出戰歐國盃

今屆歐國盃參賽球隊陸續公布初步名單，葡萄牙主帥馬天尼斯直接了當，已確定最終26人大軍名單，包括C朗榜上有名，意味呢位39歲射手將刷新紀錄，第6度出戰呢項大賽。

葡萄牙主力悉數入選，鋒線上有C朗、迪亞高祖達、拉菲爾利亞奧、祖奧菲歷斯等人，中場方面，般奴費南迪斯、貝拿度施華、域天拿，以及兩位去咗沙特阿拉伯搵食嘅魯賓尼維斯、奧達維奧艾美臣都有入選。後防有41歲老將比比，曼城中堅魯賓戴亞斯、曼聯後衞達洛治等球星。

葡萄牙陣中最受矚目始終係C朗，佢曾於5屆歐國盃登場，包括2016年奪得冠軍，屬於史上參加最多屆歐國盃決賽周嘅球員。此外，C朗累積歐國盃決賽周上陣25次入14球，兩項數字同樣係史上第一，佢今屆應該會再打破多項紀錄。

葡萄牙抽入今屆歐國盃F組，同組對手有捷克、格魯吉亞、土耳其。