意甲有望6隊踢歐聯　前提要阿特蘭大輸波？

意甲球隊今季喺歐洲賽表現出色，阿特蘭大贏歐霸盃冠軍後，費倫天拿喺下周四(30日)亦有機會捧歐協聯冠軍，而且隨住阿特蘭大奪冠，意甲下季更有機會歷史性派出6隊出戰歐聯，前提係要阿特蘭大最後2輪聯賽「甩轆」，唔好升上聯賽前4名。

意甲今季歐洲賽整體表現突出，已透過歐洲賽系數排名拎到下季「歐聯第5席」，而阿特蘭大依家就係排第5名。根據歐洲足協規例，歐霸盃冠軍嘅地位比聯賽第5名高，阿特蘭大會以歐霸冠軍身份出戰歐聯，而本身嘅「第5席」獎勵名額，就會交畀第6位嘅羅馬。

不過當中有個關鍵，係阿特蘭大必須排第5位，如果佢哋最後殺上第3或第4位，個獎勵名額會轉畀其他聯賽。阿特蘭大依家落後博洛尼亞(第3)同祖雲達斯(第4)2分，但踢少兩隊1場，阿特蘭大贏晒最後2場就一定會過頭，所以如果意甲想有6隊踢歐聯，就要望阿特蘭大輸波。