盃賽決賽5連敗　利華古遜靠德盃破魔咒？

利華古遜今季各項賽事51場不敗，估唔到第1次輸波，就係喺關鍵嘅歐霸盃決賽。利華今季雖然贏得德甲冠軍，但「決賽魔咒」仍然未解除，今仗輸畀阿特蘭大後，利華已經連續5次喺盃賽決賽輸波，周日(26日)凌晨德盃決賽對凱沙羅頓，係破咒最佳機會。

利華喺2002年曾經做「3亞王」，除德甲做「阿二」之外，歐聯決賽輸畀皇家馬德里、德盃決賽輸畀史浩克04；利華09年再入德盃決賽，但0比1輸畀雲達不來梅；20年又一次入德盃決賽，結果輸畀拜仁慕尼黑。連埋今場歐霸決賽，佢哋喺盃賽決賽5連敗。

利華教練沙比阿朗素表示：「輸實係阿特蘭大踢得更好，我哋發揮失常，好遺憾呢個情況喺決賽先出現。輸波係遲早會出現，足球世界好少會有咁長時間不敗，我以球隊為榮，但亦覺得好心痛，我哋要收拾心情準備德盃決賽，呢個係另一項挑戰，要重新振作唔容易，但我哋會盡力做好準備。」