再多3將復操！曼聯前所未有咁「齊人」

今季英超僅排第8位嘅曼聯，周六(25日)英足盃決賽係翻身最後機會，球隊賽前亦有好消息傳出，美臣蒙特、域陀連迪路夫同安東尼馬迪爾喺周三(22日)操練回歸，曼聯今季前所未有咁「齊人」！

曼聯今季傷患有超過65人次，領隊坦哈格經常埋怨無兵可用，不過英足盃決賽對曼城前，一眾主將陸續復出，利辛度馬天尼斯、華拉尼、般奴費南迪斯、拉舒福特等都喺最後2輪聯賽復出，周三操練再有美臣蒙特、域陀連迪路夫同安東尼馬迪爾加入，依家除長期傷兵杜維爾馬拉西亞之外，就只有哈利馬古尼同勞基梳爾2位主力仲傷緊。

哈利馬古尼仍有機會趕得切復出，佢日前表示：「我唔知趕唔趕得切，可能要到最後一刻先知，為曼聯捧英足盃意義重大，踢得曼聯就係要拎冠軍，上季我哋攞到英聯盃冠軍，今季亦有機會用冠軍嚟完結結球季，我哋會專注呢個目標。」