三笘薰效應！白禮頓夏天進行日本之旅

英超球會白禮頓近期忙於搵新領隊，不過夏天備戰計劃亦如火如荼，球會周四(23日)宣布將會進行日本之旅，同鹿島鹿角、東京綠茵踢2場表演賽，球隊上下都表示「三笘薰效應」係今次備戰安排最大原因。

白禮頓宣布日本之旅詳情，7月24日會先對鹿島鹿角，4日之後再對東京綠茵，球會聲明入面話：「多得三笘薰幫助，白禮頓近年喺日本受歡迎程度急升，數千日本球迷專登飛去英國睇波，甚至成為季票持有者」。

三笘薰對今次「回鄉」之旅亦好期待：「好開心有機會同白禮頓返日本比賽，知道有球迷因為我而支持一間海外球會係好神奇嘅事，對於日本足球文化發展亦有幫助，希望到時白禮頓會得到球迷熱烈歡迎。」