「美女」迷湯！66歲「加伯」首奪冠即身痕

阿特蘭大歷史性奪得歐霸盃冠軍，教練加斯柏連尼執教30年首次捧盃，佢亦以66歲117日「高齡」，成為歐霸盃史上最老嘅冠軍教練。盛傳拿玻里正力邀加斯柏連尼過檔，賽後被問到呢個傳聞，「加伯」就用一番離奇「出軌論」做回應，唔排除會離開阿特蘭大。

加斯柏連尼執教阿特蘭大8年，合約到明年夏天完結，近日有傳拿玻里將力邀佢加盟，「加伯」喺贏得歐霸冠軍後回應：「今晚我只係想慶祝，聽日會再同會長傾。我依家處於一個奇怪情況，我就好似一個有老婆仔女嘅人，但遇上一個超級美女......或者呢個例子唔係咁適合喺電視上面講。」

記者隨即為加斯柏連尼修飾用字：「會唔會係你已經有個美麗嘅居所，但有人送你一間有露台嘅豪華別墅？」加斯柏連尼就回應：「呢個例子好啲。」「加伯」嘅言論已表明拿玻里嘅斟介好有吸引力，歐霸盃冠軍隨時係佢畀阿特蘭大嘅告別禮。