費格遜同普捷天奴食飯　商討接手曼聯？

普捷天奴同車路士解約後，據報近日有新動向，就係同曼聯傳奇領隊費格遜共晉午餐，並估計今次會面同曼聯帥位有關。

《太陽報》報道，費爵爺同普捷天奴多年來經常有互動，普帥喺2013年接手執教修咸頓時，就同過即將退休嘅費格遜交手，2016年普帥執教熱刺期間，亦被影到兩人一齊食飯，當時曼聯處於換帥時期，尹戈爾即將下台，不過普帥當時執教嘅熱刺對兩人見面並無不滿。

兩年前曼聯尋找新帥，普捷天奴一度成為紅魔領隊候選人，但會方最終選擇坦哈格，兩年過去，據報無論英足盃決賽捧盃與否，坦哈格都會被辭退，就如當年尹戈爾捧盃離隊一樣。

車路士季尾表現明顯好轉，排名甚至超越曼聯，卻於此時突然辭退普捷天奴，後者回復自由身，即傳出同費Sir共晉午餐，加上球迷普遍支持普帥入魔，看來普帥同曼聯好事近。