曼聯「隱形頒獎禮」　葡國孖寶成大贏家

曼聯雖然早前取消球會年度頒獎禮晚宴，但仍然有向球員頒發獎項，隊長般奴費南迪斯獲得由球迷選出嘅「畢樹比最佳球員獎」，另一位葡萄牙國腳達洛治獲得由隊友選出嘅曼聯今季最佳球員獎，葡國孖寶成為大贏家。

曼聯今季成績欠佳，但般奴費南迪斯仍然交足功課，各項賽事上陣47場入15球及12次助攻，獲得40%球迷支持，獲得曼聯今季最佳球員「畢樹比最佳球員獎」，亦係呢位29歲中場第3次獲此殊榮，球隊史上僅次於4次獲獎嘅C朗同迪基亞。

至於由曼聯球員投票互選嘅最佳球員獎，由達洛治奪得，呢位25歲後衞今季各項賽事上陣49次，屬於隊內之冠，並貢獻3個入球及5次助攻。紅魔鬼今季備受傷兵問題困擾，達洛治仍然可以交出「鐵人數據」，自然獲得隊友信賴。

另外，阿歷真度加拿祖上年11月作客對愛華頓，以倒掛金勾入波，當選曼聯今季最佳金球。