【官宣】107分鐘贏10冠　卡臣續約曼城1年

曼城喺英足盃決賽前，宣布同38歲門將卡臣續約至2025年夏天，呢位前英格蘭國腳效力曼城5年以來，只係踢過107分鐘比賽，但就同球隊一齊拎到10個冠軍，試問點捨得走？

卡臣喺2019年由打比郡加盟後，一直係球隊3號門將，3年前英超作客4比3贏紐卡素，係佢5年來唯一一次聯賽上陣；2年前歐聯對士砵亭亦試過入替受傷嘅艾達臣摩拉斯踢17分鐘。2場比賽合共107分鐘，就係佢5年曼城生涯嘅上陣紀錄，但就有4次英超冠軍、1次歐聯冠軍、2次英聯盃冠軍等等，如果英足盃決賽贏埋，就會係佢喺曼城第11個冠軍。

卡臣續約後表開心表示：「好期待再為呢支神奇球隊踢多1季，我每日都喺哥迪奧拿、教練同隊友身上學到嘢，希望我可以推動隊中門將踢得更好，爭取更多錦標。」曼城正選門將係艾達臣摩拉斯，而2號門將史堤芬奧迪加今季亦有非常出色表現，由於艾達臣依家受傷，卡臣喺英足盃決賽將任史堤芬奧迪加副手。