高柏尼第1擊！想帶基亞利殊去拜仁

高柏尼即將成為拜仁慕尼黑新教練，呢位比利時教頭更已開始籌備轉會。據英國《太陽報》報道，高柏尼打算向曾效力嘅曼城挖角，目標直指英格蘭國腳基亞利殊，希望佢同哈利卡尼合組攻擊拍檔。

報道指高柏尼今個夏天嘅王牌收購，頭號獵物直指基亞利殊，呢位28歲翼鋒今季喺曼城地位大幅下降，全季只有10場聯賽踢正選，高柏尼希望佢可以借鑒查頓辛祖喺德甲翻生嘅事例、以及同英格蘭國家隊隊友哈利卡尼合作嘅吸引力，促成呢單驚天轉會。

曼城3年前用1億鎊簽入基亞利殊，所以拜仁如果要提出收購，相信亦要動用同上年買哈利卡尼接近嘅轉會費(約1億鎊)。報道指拜仁如果簽入基亞利殊，基拿比同利萊辛尼其中一人要讓出正選，而曾經同高柏尼做過隊友嘅利萊辛尼，預計會同基亞利殊成為正選兩翼。