高柏尼第1击！想带基亚利殊去拜仁

高柏尼即将成为拜仁慕尼黑新教练，呢位比利时教头更已开始筹备转会。据英国《太阳报》报道，高柏尼打算向曾效力嘅曼城挖角，目标直指英格兰国脚基亚利殊，希望佢同哈利卡尼合组攻击拍档。

报道指高柏尼今个夏天嘅王牌收购，头号猎物直指基亚利殊，呢位28岁翼锋今季喺曼城地位大幅下降，全季只有10场联赛踢正选，高柏尼希望佢可以借鉴查顿辛祖喺德甲翻生嘅事例、以及同英格兰国家队队友哈利卡尼合作嘅吸引力，促成呢单惊天转会。

曼城3年前用1亿镑签入基亚利殊，所以拜仁如果要提出收购，相信亦要动用同上年买哈利卡尼接近嘅转会费(约1亿镑)。报道指拜仁如果签入基亚利殊，基拿比同利莱辛尼其中一人要让出正选，而曾经同高柏尼做过队友嘅利莱辛尼，预计会同基亚利殊成为正选两翼。