基奧特歐國盃後退出法國隊　留低一項紀錄

法國前鋒基奧特接受《隊報》訪問時透露，將於今屆歐國盃結束之後退出國家隊，呢位37歲老將早前亦已經決定今夏離開AC米蘭，轉投美職球隊FC洛杉磯，令自己有更多時間陪伴家人。

基奧特係法國隊史上最多入波球員，上陣131次入57球，並有16次助攻，屬於法國奪得2018年世界盃冠軍嘅功臣之一。雖然基奧特已年屆退役年紀，但法國主帥迪甘斯繼續徵召呢位射手參加今屆歐國盃。

基奧特向《隊報》表示，今屆係佢最後1次參加國際大賽：「決定去美職搵食，就係為咗有更多時間享受家庭樂，今屆歐國盃之後，我會退出國家隊，必須讓路畀年輕球員。」基奧特寶刀未老，今季意甲上陣34場入14球，效力AC米蘭3季之中，最多聯賽入波嘅一季。