莫拉達「賤價」離隊　馬體會搵新前鋒

馬德里體育會今季西甲排第4位，前鋒艾華路莫拉達雖然下半季「死火」，但仍以15個入球成為陣中首席射手，不過呢位31歲老將盛傳將會離隊，而且合約內更有1,500萬歐元嘅「賤價」買斷條款，據報馬體會已經打定輸數，準備物色新前鋒。

西班牙媒體《Relevo》爆料，莫拉達合約嘅買斷條款只係1,500萬歐元，據報沙特球會艾沙比同多間美職球會已向佢招手，而莫拉達老婆喺馬體會最後一場主場後，更喺社交網貼上「全家福」留言：「最後1次」，似係暗示佢哋將會走人。

馬體會似乎亦打定輸數，消息指佢哋將引入一名新前鋒，史特加嘅古拉斯、維拉利爾嘅阿歷山大索洛夫同基羅納射手杜夫比克係3大目標，其中古拉斯嘅合約有1,750萬歐元買斷條款，比起另外2個目標更「抵玩」。