鬧劇結束　巴塞隆拿辭退沙維

巴塞隆拿官方宣布，主帥沙維今季結束後離任，不會擔任來季主教練。據報巴塞高層周五(24日)開會，會後宣布此決定，有分出席會議嘅會長拉波塔未有接受訪問離開。

沙維是巴塞隆拿「地上最強」成員，掛靴後轉赴卡塔爾落班及展開教練生涯，2021年11月初回巢接掌教鞭，領軍接近3季共141場比賽，取得89勝23和29負，入277球失157球，贏得1次西甲及1次西超盃。

巴塞今季餘下最後一輪煞科戰，將會作客西維爾，亦是沙維第2度告別巴塞。今季季中沙維曾宣布季尾離隊，其後巴塞成功挽留至下季，如今巴塞又決定將佢辭退，做法相當肉酸，就連煞科戰對手西維爾主帥科里斯都睇唔眼，直指巴塞對待功臣方式太差，美斯係咁，依家沙維又係咁，令人心寒。

另邊廂，巴塞新主帥亦敲定，據報前拜仁及德國隊主帥費歷克將會上任，已簽約至2026年。