多蒙特唔信邪　邀請高普睇歐聯決賽

高普卸任利物浦主帥，可以自由自在過想要嘅生活，多蒙特行政總裁華斯基向佢全家發出邀請，希望高普舉家入場觀看歐聯決賽，但原來高普現身決賽，竟然對皇馬有利。

華斯基表示：「邀請高普純粹因為大家係老友，我都好希望高普回復活力，同家人一齊開心睇波。」高普被譽為多蒙特歷史上最成功主帥之一，協助球隊贏過兩次德甲、兩次德超盃同1次德國盃，亦係對上一次多蒙特殺入歐聯決賽嘅主帥，當年決賽地點同樣係溫布萊球場，只係多蒙特最終喺歐聯決賽落敗。

皇馬最近兩次贏歐聯冠軍，都在決賽擊敗高普領軍嘅利物浦封王，分別係2018年決賽同2022年決賽，均由皇馬獲勝捧盃；《阿斯報》報道，皇馬樂於在今屆決賽見到高普在場，「銀河艦隊」會認為，見到高普係捧盃好兆頭。