一種情況　麥巴比可踢巴黎奧運

法國正爭取王牌前鋒基利安麥巴比參加今夏巴黎奧運男足賽事，據報就連法國總統馬克龍親自游說皇馬會長皮里茲放人，但遭拒絕，不過有傳媒表示，如果法國隊在今夏歐國盃早段出局，麥巴比就可以踢奧運。

對於參加巴黎奧運，麥巴比坦言身不由己：「奧運？我要等等，唔係我想唔想，亦唔係自己一個人可以決定。」佢暗示要視乎皇馬決定，而《隊報》指皇馬決定不准任何球員參加奧運，包括即將加盟嘅麥巴比。

不過事情唔係講得咁死，《馬卡報》報道，只有一種情況，麥巴比先可以參加巴黎奧運，就係法國隊喺今夏歐國盃早段出局。皇馬禁止麥巴比踢奧運，都係怕佢踢「太公波」過度頻密，有受傷風險，但如果法國隊喺歐國盃早段出局，麥巴比消耗不大，就冇理由再阻止佢踢奧運。

今夏歐國盃日期由6月14日至7月13日，在鄰國德國舉行，至於巴黎奧運男足就由7月24日至8月9日。