基羅納狂派7蛋　神鋒「戴帽」奪金靴獎叫胡

周六(25日)凌晨西甲，「神奇球隊」基羅納又有佳作，主場以7比0大勝CF格蘭納達，前鋒杜夫比克上演「帽子戲法」入3球，呢位26歲烏克蘭國腳今季聯賽已有24球進帳，以1球優勢反超前維拉利爾前鋒阿歷山大索洛夫，升上射手榜第1位，有望奪取金靴獎。

基羅納早已穩奪前4位，今場煞科戰對住篤定降班嘅CF格蘭納達，並冇留力，上半場已經領先3球，最終狂派7蛋。兩位烏克蘭球員表現最搶鏡，除咗杜夫比克射入3球之外，迪斯漢高夫亦梅開二度。加上後衞艾利加西亞，以及後備上陣嘅史杜安尼各建一功，創下基羅納今季最大勝仗，並且38場聯賽轟入85球，成為西甲史上第6支單季入波「85+」球隊。

至於杜夫比克能否奪得今季西甲神射手，仲要睇埋周六(25日)晚維拉利爾作客奧沙辛拿賽果，維拉利爾前鋒阿歷山大索洛夫現時有23球進帳，呢位28歲挪威國腳上仗對皇馬，射入4球，腳風非常順，相信一眾隊友今場應該會全力為佢創造入波機會，爭奪神射手殊榮。