【官宣】意甲亞軍唔收貨　皮奧利被炒　

繼車路士、巴塞隆拿之後，再有歐洲大球會炒主帥，AC米蘭正式宣布教練皮奧利離任，呢位58歲意大利名帥2年前協助球隊奪得意甲冠軍，今季獲得亞軍，但會方仍然唔收貨，決定換帥，盛傳將聘請里爾教練保羅方辛加接手執教。

皮奧利2019年開始擔任AC米蘭教練，成功帶領球隊復興，領軍捧2021/22年意甲冠軍，亦係「紅黑兵團」相隔11年再奪得聯賽冠軍，上季打入歐聯4強。

不過，AC米蘭今屆歐聯分組賽出局，加上聯賽落後冠軍國際米蘭19分，表現令人失望，會方未等踢煞科戰，已經宣布同皮奧利解約。據悉皮奧利仍然會領軍出戰周日(26日)凌晨今季最後1場聯賽主場對沙蘭力坦拿之後，先至正式離隊。

早前傳出另一支意甲球隊拿玻里有意邀請皮奧利執教，甚至已傾掂數，雙方將會簽約2年。