曹亞文尼無緣歐聯決賽　皇馬失「護身符」

皇馬將於6月2日凌晨歐聯決賽對多蒙特，呢支西甲勁旅受不利消息打擊，教練安察洛堤透露，中場曹亞文尼因傷無緣今場世紀之戰。曹亞文尼今季為「銀河艦隊」踢31場正選，球隊都保持不敗，佢缺陣之下，皇馬猶如失去「護身符」。

皇馬出戰周日(26日)凌晨西甲煞科戰主場對貝迪斯前夕，安察洛堤表示曹亞文尼有傷在身，無法為「銀河艦隊」踢餘下2場比賽：「曹亞文尼只能進行單獨訓練，相信踢唔到歐聯決賽，至於能否為法國參加歐國盃，仍然有待觀察。」

曹亞文尼喺歐聯4強次回合對拜仁慕尼黑受傷後，已經缺陣近3場比賽，並由另一位法國國腳卡馬雲加填補其正選防守中場位置，預料卡馬雲加將於歐聯決賽繼續擔正。

曹亞文尼今季皇馬各項賽事上陣38場入3球及1次助攻，根據「轉會權威」記者羅曼諾(Fabrizio Romano)透露，呢位24歲中場今季31次擔任正選，皇馬取得25勝6和不敗。因此，曹亞文尼無緣歐聯決賽，皇馬爭冠有暗湧。