車路士接觸「翻版哥帥」　願重金買斷佢

車路士早前同領隊普捷天奴解約之後，正在積極物色新帥，包括3大目標馬利斯卡、法蘭克、基蘭麥堅拿，根據英國《太陽報》爆料，車仔已率先派人同李斯特城領隊馬利斯卡接觸，呢位有「翻版哥迪奧拿」之稱嘅44歲意大利少帥有望跑出，成為車路士新領隊。

馬利斯卡上年夏天成為李斯特城主帥後，協助球隊奪得今季英冠冠軍，下季升上英超比賽，呢位「光頭仔」立即人氣急升，引來車路士挖角。據悉馬利斯卡同李斯特城合約設有1,000萬鎊(約1億港元)毀約金條款，呢個數額對於豪門車路士而言，只係濕濕碎，所以已經開始同馬利斯卡傾加盟事宜。

馬利斯卡曾於2020年擔任曼城青年軍教練，雖然一度離隊，但之後回巢做哥迪奧拿助教，加上外型十分似哥帥，因而有「翻版哥帥」之稱，加上教波亦取得佳績，難怪車路士視佢為新帥首選。