哥迪奧拿本土盃賽決賽奪冠率91%　僅1次失手

周六(25日)晚10點將上演英足盃決賽，曼城對曼聯，上屆冠軍曼城整體實力佔優，備受睇好可以再次擊敗紅魔鬼，而且曼城領隊哥迪奧拿教波生涯，11次領軍打入本土盃賽決賽，有10次奪得冠軍，成功率高達91%，難怪「藍月亮」冠軍賠率熱到只有1.13倍。

哥迪奧拿執教巴塞隆拿期間，曾於2009、11及12年，3次打入西班牙盃決賽，其中2次捧盃，只有2011年戰至加時0比1不敵由摩連奴領軍嘅皇馬。哥迪奧拿成為拜仁慕尼黑教練後，2次打入德國盃決賽都奪得冠軍。

此外，哥迪奧拿2016年夏天開始執教曼城，之前2次打英足盃及4次入英聯盃決賽，全部捧盃而回。換言之，呢位西班牙名帥教波生涯，11次領軍打入本土盃賽決賽，有10次奪得冠軍，只有1次失手，恐怕曼聯好大機會連續2屆英足盃決賽屈居亞軍。