費歷克搵助手　首選艾簡達拿

巴塞隆拿來季將會由德國籍主帥費歷克執教，據報費歷克亦開始埋班組織教練團，需要物色一名精通德語同西班牙語嘅助手，首選係佢拜仁舊部、利物浦嘅堤亞高艾簡達拿。

33歲嘅堤亞高艾簡達拿踢過巴塞同拜仁，近年喺利物浦長期養傷，季尾約滿自由身離隊，去向未定。《阿斯報》報道，費歷克需要一名能夠協調球員關係嘅助手，堤亞高艾簡達拿曾與費歷克合作無間，亦熟悉巴塞運作，係最佳人選，問題係要睇球員本人意願。

費歷克另一位心水人選都係拜仁舊部，就係查維靴南迪斯，不過佢既未踢過巴塞，而且德語水平麻麻，唔係咁理想，仲有一位心水係效力貝迪斯嘅馬斯巴查，佢係巴塞青訓出身，亦去過多蒙特搵食，不過同費歷克甚少接觸。