沙加重炮破咒 利華古遜歷史性做雙冠王

2024年05月26日 12:00
東網電視
更多新聞短片
利華古遜史上首次做雙冠王。(Getty Images)
利華古遜喺歐霸盃決賽飲恨後,周日(26日)凌晨德國盃決賽重振雄風,憑格列沙加重炮一箭定江山,1比0擊敗凱沙羅頓捧盃,打破球隊「決賽5連敗」魔咒,同時實現利華古遜史上首次「雙冠王」(德甲+德盃)偉業。
利華古遜技高一籌,16分鐘格列沙加禁區外勁射先拔頭籌,但完半場前有哥蘇奴2黃1紅被逐。踢少個嘅利華古遜下半場雖然受壓,但仍然力保勝局至完場,繼1993年後第2度捧走德盃冠軍。事實上,利華古遜創會120年來,只係贏過4個冠軍,其中2個就係今季史無前例嘅「雙冠王」。
教練沙比阿朗素賽後表示:「我覺得好光榮,球隊值得做雙冠王,今季係一個大成功嘅故事,我需要多啲時間去欣賞呢個咁成功嘅球季,依家係享受嘅時候,每個球員都做好自己嘅本份,呢個我認為係相當重要。」利華古遜今季各項賽事53場有52場不敗,唯一敗仗就係歐霸盃決賽。