艾阿恩大炒橫濱水手　相隔21年再捧亞冠盃

周日(26日)凌晨亞冠盃決賽次回合，艾阿恩主場以5比1大勝有半場時間10人應戰嘅橫濱水手，兩回合合計反勝6比3，相隔21年再次奪得呢項錦標，亦係至今唯一捧過亞冠盃嘅阿聯酋球隊。

艾阿恩首回合作客輸1比2，今仗返回主場大發神威，開賽8分鐘就由前鋒拉謙美射入，呢位27歲摩洛哥國腳之後博到12碼，由卡古主射入網領先至2球。雖然橫濱水手把握對手防線犯錯，40分鐘憑恩蘇沙入波追番1球，但上半場補時，門將威廉樸比衝出禁區，踢跌單刀嘅拉謙美，被球證直接出示紅牌趕出場。

橫濱水手下半場踢少1人，更加冇還擊之力，艾阿恩再由拉謙美入多1球，加上後備上陣嘅拉巴補時梅開二度，大勝5比1，繼2003年後，第2次奪得亞冠盃冠軍。

艾阿恩晉級過程之中，先後淘汰有C朗助陣嘅艾納斯，以及另一支球星如雲嘅沙特阿拉伯勁旅希拉爾，獲得冠軍絕對實至名歸。