巴塞4年3奪女子歐聯冠軍　入場人數破紀錄

周日(26日)凌晨女子歐聯決賽，上屆冠軍巴塞隆拿女足以2比0擊敗里昂女足，成功衞冕，亦係「巴女」近4屆第3次奪得冠軍，並成為今季聯賽及盃賽「4冠王」。值得一提，今場有50,827人入場觀戰，打破女子歐聯決賽入座人數紀錄。

巴塞隆拿女足63分鐘由邦瑪迪入波打開紀錄，佩泰娜絲補時2分鐘後備上陣，僅用3分鐘就建功，為球隊鎖定2比0勝局。巴塞隆拿女足近年戰績彪炳，連續4屆打入女子歐聯決賽，包括2021年首嘗冠軍，打破當時5連冠嘅里昂女足壟斷局面，雖然1年後決賽輸波衞冕失敗，但近2屆都捧盃，建立巴塞女足王朝。

巴塞隆拿女足今季已奪得女子西甲、西班牙盃及超級盃冠軍，加上歐聯錦標，完成「4冠王」壯舉，成績遠勝今季四大皆空嘅巴塞男足。