曼城慶功宿醉未醒？洛迪74場不敗紀錄告終

曼城喺英足盃決賽不敵曼聯，球員表現完全走晒樣，唔少球迷批評佢哋早前開慶功派對玩得太癲，形容球員表現「宿醉未醒」。其中一個被影到飲到「啤啤夫」西班牙中場洛迪卡斯簡迪，個人74場不敗紀錄亦慘被終結，佢對上一次有份落場而輸波，已經係上年2月份嘅事。

曼城喺英超實現4連霸後，全隊開慶功派對，玩到第2日凌晨5點，基亞利殊、洛迪、艾寧夏蘭特等人被影到飲到醉醺醺咁離開，今場決賽曼城球員表現極為失常，球迷自然歸咎於佢哋玩得太癲。不過基爾獲加賽後反駁：「冇問題喎，我哋上星期日(19日)開P，隔咗6日先比賽，運動員咁都恢復唔到就唔使踢波啦！揀嗰個時間慶祝係全隊決定，唔好將輸波賴落去，問題係我哋落場嘅球員。」

除洛迪嘅不敗紀錄完結外，前鋒艾寧夏蘭特嘅「決賽入球荒」亦延續，呢位挪威前鋒加盟曼城後，踢過6場決賽部都交白卷，當中包括1場歐聯決賽、2場英足盃決賽、2場社區盾同1場歐超盃，當中5場係踢足90分鐘，踢大賽嘅表現再次受到質疑。