卻奧斯感人告別　皇馬西甲煞科創紀錄

周日(26日)凌晨西甲，已經穩奪冠軍嘅皇家馬德里今季聯賽煞科戰，同貝迪斯打和0比0，落實今屆歐國盃後掛靴嘅中場卻奧斯成為主角，今仗係佢最後1次喺主場巴拿貝球場比賽，獲得隊友及球迷熱情歡送，場面感人，呢位34歲德國國腳不禁流下英雄淚。

卻奧斯今場擔任正選，開賽前雙方球員列隊迎接佢入場，皇馬球員都着上卻奧斯嘅8號球衣，向呢位傳球大師致敬。雖然卻奧斯即將退休，但今場仍然交足功課，110次傳球有107次成功交畀隊友，包括3次關鍵傳球，13次長傳及2次攔截，並曾主射罰球，但對手門將法蘭韋埃迪斯飛身撲出，未能入波實在可惜。

戰至87分鐘，教練安察洛堤換走卻奧斯，畀佢接受球迷歡呼及鼓掌，隊友亦輪流同佢擁抱，場面非常感人，賽後皇馬球員一齊將卻奧斯拋起。

今場兩隊互交白卷，皇馬今季西甲有21場不失球，繼續刷新球隊單季聯賽最多場「零封」紀錄，皇馬將於6月2日凌晨歐聯決賽對多蒙特，亦係卻奧斯最後1次為「銀河艦隊」披甲。