坦哈格重演34年前費Sir好戲　紅魔新王朝正式開始？

備受下台壓力嘅曼聯領隊坦哈格協助球隊捧英足盃冠軍後，有望保住帥位，翻查歷史，紅魔鬼傳奇主帥費格遜1989/90年球季，亦一度面臨被炒，佢該季最後帶領曼聯奪得英足盃冠軍，避過下台之外，其後更建立紅魔王朝，莫非今次將歷史重演？

費格遜1986年11月成為曼聯領隊，執教頭幾年成績欠佳，其中1989/90年球季，踢38場聯賽僅13勝9和16負排13位，比曼聯今季聯賽成績更差，當時費Sir幾乎被炒，幸好季尾捧英足盃冠軍，先至保住帥位，3年後奪得英超冠軍，展開曼聯盛世。

坦哈格現時處境同當年費格遜相似，聯賽成績差，但卻獲得英足盃冠軍，隨時可以成為另一位費Sir，帶領球隊重新起飛，曼聯應唔應該換帥，陷入兩難局面。

值得一提，另一位荷蘭名帥尹戈爾協助曼聯奪得2016年英足盃冠軍，但都被炒，到底坦哈格會步尹戈爾後塵，抑或成為「新費Sir」，大家拭目以待。