唔返曼聯　朗尼再教英冠球隊

英冠球隊普利茅夫正式宣布聘請曼聯名宿朗尼擔任領隊，據悉雙方簽約3年，原本盛傳呢位38歲少帥有機會重返紅魔鬼，加入教練團，但最終都係選擇去英冠「磨練」自己。

朗尼掛靴之後，一直同英冠球隊好有緣，曾經做過2支英冠球隊打比郡、伯明翰主帥，亦試過回巢美職球隊華盛頓聯隊做教練。不過，呢位英格蘭殿堂級射手教波表現，遠唔及踢波，3份主帥工作都因為成績差被炒，包括上年10月開始執教伯明翰，但領軍15場僅2勝，結果今年1月初就執包袱。

朗尼成為普利茅夫領隊後話：「感謝球會管理層對我嘅支持，係我事業另一次重要起步，要幫助球隊建立強大陣容，踢出華麗足球。」不過，外界普遍睇淡朗尼前景，因為普利茅夫實力弱，今季英冠僅排尾四，勉強護級成功，以朗尼過往教波表現，恐怕難以協助球隊下季翻身。