馬恩奧被史高斯捧上天　坦哈格：小心撻死！

曼聯今季最後一擊勇奪英足盃冠軍，「新人王」馬恩奧成為贏波功臣，呢位英格蘭新晉國腳，以19歲36日之齡，成為近60年英足盃決賽最年輕入球者，賽後更被捧到上天，名宿史高斯更聲稱「馬恩奧勁過我10倍」！不過曼聯領隊坦哈格就警告，呢個情況係英格蘭式陷阱，稍有不慎隨時會「撻死」。

馬恩奧成為曼聯英雄後，史高斯喺社交網發文：「呢個星期睇到好多人將馬恩奧同我比較...大家唔好嘥時間，佢依家勁過我19歲嗰陣10倍，佢好冷靜、觀察力強，而且專喺大賽入波，呢個細路非常特別，而且佢仲係流住曼聯嘅血！」

馬恩奧依家萬千寵愛在一身，但坦哈格就提醒：「大家要保持冷靜，你哋英格蘭人最叻就係將球員或領隊捧到上天，然後等到佢有1、2場波失準，就將佢打到變地底泥，所以冷靜係好緊要。馬恩奧係好出色，我好享受睇佢比賽。」