揸正嚟做！阿特蘭大贏波　踢羅馬出歐聯

周一(27日)凌晨意甲最後一輪，焦點落喺羅馬身上，佢哋要寄望阿特蘭大失分先有踢歐聯希望，同時亦掌握對手安玻里護級命運。最終羅馬作客1比2輸畀安玻里，送對手「上岸」，而阿特蘭大亦揸正嚟做，主場3比0大勝拖連奴，成功殺入前4名，意味排第6位嘅羅馬未能以替補身份出戰歐聯。

由於阿特蘭大上周拎到歐霸冠軍，已肯定下季出戰歐聯，如果佢哋最後排聯賽第5，個歐聯席位就會轉讓畀第6位(羅馬)，但阿特蘭大今場大勝之後，成功超越博洛尼亞升上第4。呢個結局，令第5名嘅博洛尼亞以意甲今季賺返嚟嘅「歐聯第5席」身份踢歐聯，由於聯賽前4名嘅歐聯資格，係唔可以轉讓畀同聯賽球隊，所以羅馬只能出戰歐霸盃。

阿特蘭大之前踢歐霸盃，主場對費倫天拿嘅補賽要喺6月3日凌晨進行，成為今季意甲真正「煞科戰」，不過呢場對歐戰形勢冇影響，國際米蘭、AC米蘭、祖雲達斯、阿特蘭大同博洛尼亞會踢下季歐聯；羅馬出戰歐霸盃；拉素就會出戰歐協聯；排第8嘅費倫天拿如果贏到歐協聯，亦可以出戰歐霸盃；費辛隆尼、薩斯索羅同沙蘭力坦拿則要降班。