沙維贏波告別巴塞　終極開火叫費歷克睇路

巴塞隆拿喺周一(27日)凌晨西甲煞科戰，作客2比1擊敗敗西維爾，以贏波送別教練沙維。沙維對呢場「離隊鬧劇」明顯仍耿耿於懷，賽後公開叫會長拉波塔向公眾交待原因，同時警告盛傳將會接任嘅費歷克要睇路，因為巴塞隆拿係支極度難教嘅球隊。

沙維今年初宣布季尾離隊，之後因成績冒升被巴塞挽留，上月宣布雙方下季會繼續合作，點知早前沙維發表球會財政問題評論，結果得罪會長拉波塔，雙方再一次證實「分手」。巴塞喺煞科戰2比1擊敗西維爾後，沙維亦正式離開，佢喺最後一次記者會怨氣十足：「我覺得我嘅工作冇得到應有肯定，離開冇令我得到自由，因為我想留低。離開係球會嘅決定，當中原因應該由做決定嘅人去解釋。」

西班牙傳媒廣泛報道，德國教練費歷克即將接任，沙維亦作出忠告：「無論邊一個接任，都要知道自己將面臨困難情況，本身巴塞教練已經好難做，而且仲有個好不利嘅財政問題，巴塞個帥位絕對唔易坐。」據報費歷克已答應同巴塞隆拿簽約2年，並會帶同2名德國助手一齊加盟。