【有片】曼城驚嚇巡遊　基亞利殊險跌落巴士

東網電視

曼城勝利巡遊慶祝英超4連霸。(Getty Images)

曼城喺英足盃決賽輸畀曼聯，不過無損球員慶祝今季英超「4連霸」心情，球會周日(26日)喺曼徹斯特市中心舉行勝利巡遊，過萬球迷上街慶祝將曼市染成藍色，一眾職球員亦玩到忘形，基亞利殊就曾2次喺開蓬巴士上層企唔穩，幾乎跌出車外，場面驚嚇。

曼城今次巡遊歷時1個半鐘左右，唔少球迷揮舞旗幟同放晒煙花，一眾球員亦喺巴士上唱歌跳舞兼飲酒，基亞利殊繼上年巡遊後再做主角，佢喺巴士上層邊緣跳舞，期間巴士突然開動，基亞利殊即企唔穩幾乎跌落車，而且相同情況出現2次，第1次有洛迪卡斯簡迪擋住、第2次就靠謝利美杜古拉住，先至冇釀成意外。

曼城領隊哥迪奧拿喺巡遊後向球迷表示：「贏英超係偉大成就，所以我哋又喺呢度慶祝。連我自己都冇諗過會喺曼城8年，贏波好似變成例行習慣，但絕對唔係。我哋明年會再嚟，我哋要拎埋英足盃冠軍！」

on.cc東網