【有片】曼聯又贏！加拿祖倒掛膺全年金球

曼聯近日喜事連連！繼擊敗曼城贏得英足盃冠軍後，決賽有份入波嘅阿歷真度加拿祖，喺上年11月對愛華頓射入嘅精彩倒掛金勾，亦被選為英超年度金球，可喜可賀！

呢個金球出現喺曼聯作客3比0贏愛華頓一戰，開波3分鐘曼聯右路進攻，拉舒福特交畀達洛治殺落底線傳中，個波落點睇落唔啱位，但加拿祖就走番轉頭幾步，離門15碼施展倒掛抽入。加利尼維利當時仲話呢球嘅精彩程度，更勝朗尼2011年對曼城嘅經典倒掛入波。

加拿祖年度金球：https://x.com/i/status/1794670860063957376　

只得19歲嘅加拿祖今季極速上位，各項賽事為曼聯上陣50場，英足盃決賽嘅入波係佢今季第10球，而且亦入選阿根廷國家隊嘅美洲盃大軍名單，今季對呢位小將嚟講算係大豐收。