歐協聯唔踢也罷？傳車路士考慮棄賽

曼聯爆冷擊敗曼城贏得英足盃後，英超排第6位嘅車路士，下季只能參加歐協聯賽事。據英國《Football London》報道，車路士有可能會放棄參賽，從而逃避歐洲足協比英超更加嚴厲嘅財政規限。

歐洲足協嘅財政規例，只容許球會喺22年至24年虧損6,850萬鎊，遠低於英超上限嘅1.05億鎊，而且車路士之前賣2間球場酒店畀姊妹公司，雖然喺英超成功避過處分，但歐洲足協嘅計算並唔包括房產收入，令車路士違規機會更高。

意甲嘅祖雲達斯上季本來拎到歐協聯資格，但歐洲足協喺上年7月底宣布，祖雲達斯因財政違規並禁參賽兼罰款。如果車路士最後計唔掂條數，有可能會放棄參加歐協聯賽事。