哥迪奧拿合約尚1年　真係會走？

哥迪奧拿執教曼城已經8年，係佢生涯教得最長嘅球會，據報佢同「藍月亮」尚餘1年合約，雙方仍未開啟續約談判，曼城高層交畀哥帥全權決定，該位西班牙名帥有好大機會離隊，結束藍月王朝。

《每日郵報》報道，曼城高層給予哥迪奧拿充分空間去做決定，會方當然唔想哥帥離隊，不過哥迪奧拿對於續約一直冇表示，知情人士更指哥帥堅持明夏約滿離隊，唔會延長合約。

近日曼城有新構思，就係希望哥迪奧拿延長1季，教到2026年，執教曼城滿10年後光榮引退，哥迪奧拿對此未有回應，早前更強烈暗示「離結束好近」。

哥帥嘅老對手高普因為「能量耗盡」，今季解約離開利物浦，哥迪奧拿就因為「已無目標」而打算休息；據報曼城即將物色繼任人，包括基羅納主教練米高、德國國家隊領隊拿高斯文、利華古遜主帥沙比阿朗素都係人選，哥帥個人就揀白禮頓領隊迪薩比。