曼聯同UEFA拆掂　唔使被罰「降格」踢歐協聯

曼聯排除萬難奪得英足盃冠軍，成功拎到下季歐霸盃參賽資格，但原來仲有一個隱憂，由於老闆拉特克利夫另一球會尼斯亦拎到歐霸盃資格，喺歐洲足協禁止兩間「同老細」球會參加相同賽事下，曼聯有可能會被罰「降格」踢歐協聯。不過，曼聯母公司INEOS就發出聲明，表示會同歐洲足協(UEFA)「拆掂」，令曼聯同尼斯可以一齊參賽。

拉特克利夫目前有曼聯27.7%股份，但收購協議入面，「拉爵」需要持續投資2.45億鎊，持股會增加到超過UEFA定下嘅30%「話事權界線」。假如UEFA「揸到正」，曼聯係會被罰降格嘅一隊，因為條例係聯賽排名較高嗰隊優先參賽，尼斯排法甲第5就「勝於」曼聯嘅英超第8。

對於外界擔憂，INEOS就發聲明話：「我哋留意到兩間球會(曼聯同尼斯)嘅處境，並已經同歐洲足協直接對話，我哋相信已經搵到解決方案。」其實類似情況近年經常出現，上年白禮頓同聖加萊聯、阿士東維拉同甘馬雷斯、圖盧茲同AC米蘭都有同樣問題，但最終都傾掂數一齊參賽。