曼联同UEFA拆掂　唔使被罚“降格”踢欧协联

曼联排除万难夺得英足杯冠军，成功拎到下季欧霸杯参赛资格，但原来仲有一个隐忧，由于老板拉特克利夫另一球会尼斯亦拎到欧霸杯资格，喺欧洲足协禁止两间“同老细”球会参加相同赛事下，曼联有可能会被罚“降格”踢欧协联。不过，曼联母公司INEOS就发出声明，表示会同欧洲足协(UEFA)“拆掂”，令曼联同尼斯可以一齐参赛。

拉特克利夫目前有曼联27.7%股份，但收购协议入面，“拉爵”需要持续投资2.45亿镑，持股会增加到超过UEFA定下嘅30%“话事权界线”。假如UEFA“揸到正”，曼联系会被罚降格嘅一队，因为条例系联赛排名较高嗰队优先参赛，尼斯排法甲第5就“胜于”曼联嘅英超第8。

对于外界担忧，INEOS就发声明话：“我哋留意到两间球会(曼联同尼斯)嘅处境，并已经同欧洲足协直接对话，我哋相信已经搵到解决方案。”其实类似情况近年经常出现，上年白礼顿同圣加莱联、阿士东维拉同甘马雷斯、图卢兹同AC米兰都有同样问题，但最终都倾掂数一齐参赛。