【香港足球明星選舉】陳肇鈞成4料足球先生

「2023-24香港足球明星選舉」頒獎典禮，周二（28日）晚上7點假香港會議展覽中心盛大舉行，「香港足球先生」由一直呼聲最高的大埔中場、港隊主力陳肇鈞（Philip）大熱當選，兼令他成為4料「足球先生」。Phillp亦是繼2015至16球季的葉鴻輝後，港超聯史上第2位華將得獎者。

陳肇鈞今季表現出色，在聯賽攻入9球，助大埔勇奪聯賽第2名，最終除榮獲最佳11人、最受球迷歡迎球星外，更首度當選香港足球先生，成為繼葉鴻輝後，第2位當選足球先生的港將。同時Philip又憑在「亞洲盃」攻入第1000球，再取「港超聯港隊最佳球員」一獎，最終成為「4料足球先生」。

屬於今屆頒獎禮最大贏家的Philip，受訪時直言有種一吐烏氣的感覺：「我覺得放低咗好多包袱、辛酸同烏氣，10幾20年嘅辛苦可以喺今個晚上釋放晒。」同時他又希望借今次連奪4獎，為華人球員爭一口氣：「依個獎係屬於香港人，證明到香港球員係可以，希望令球迷感到一萬分驕傲。港超係有好多高質素外援、入籍兵，但我做到嘅嘢其他華人球員都做到，大家唔可以睇少自己，心態注定命運。我可能淨番3至5年生涯，希望之後有人可以超越我攞到更多獎。」

提到來季去向，Philip表示未有定案，但稱假如留在香港的話，會希望繼續為大埔效力：「我覺得今季大埔只係差少少，想同兄弟再戰多次，下季再部署好嘅話，就算有冇我都好，一定可以再創佳績。」