華拉度列重返西甲　大哨想賣盤

上季降落西乙嘅華拉度列，今季大打爭氣波之下，日前主場3比2擊敗維拉利爾B隊，提前1輪鎖定升班資格，重返西甲，班主「大哨」朗拿度都有入場睇波，完場後落草地同球員分享勝利喜悅，不過佢唔想再做班主，打算賣盤，希望搵人接手。

華拉度列落到西乙成績突出，尤其是踏入3月分重要時刻交出穩定表現，打出7勝3和10場不敗走勢，擊敗維拉利爾B隊後，領先第3位伊巴4分，提前1輪取得升班資格。

完場後，朗拿度穿上9號球衣走落草地同球員一齊慶祝，升班雖然高興，但佢並未改變出售球隊嘅想法，佢話：「升班當然開心，我收到3分報價，買家好有誠意，呢幾日我會好好抖一抖，之後會做出合適嘅決定。」

朗拿度早前出售巴甲球隊高士路全部股分，當時已有消息指佢打算賣埋華拉度列，唔再做班主，依家只係付諸行動。華拉度列係朗拿度買入嘅首支球隊，2018年買入51%股分成為大股東，轉眼6年，期間兩度降班，係甲乙組升降機。